Kommunikasjon, språk og tekst

Språk er nøkkelen til vennskap, leik og læring. I barnehagen vår møter barna eit miljø rikt på forteljingar, song, rim og gode samtalar, der både ord og kroppsspråk får plass. Vi legg vekt på å skape språkglede i kvardagen, slik at barna får tryggleik til å uttrykkje seg og dele opplevingar med andre.

Gjennom høgtlesing, forteljingar, rim, regler, song og leik får barna rike og varierte erfaringar som er avgjerande for å utvikle språk og forstå omgrep. Kommunikasjon er eit vekselspel mellom å motta og tolke bodskap og sjølv vere avsendar. Samtalar om opplevingar, tankar og kjensler styrkjer både språklege ferdigheiter og evna til å uttrykkje seg.

Tekst omfattar både skriftlege og munnlege forteljingar, dikt, poesi, rim, regler og songar, og slik blir språk og kultur overførte frå generasjon til generasjon.

Rammeplanen seier:
«Gjennom arbeid med kommunikasjon, språk og tekst skal barnehagen bidra til at barna leikar, improviserer og eksperimenterer med rim, rytme, lydar og ord og utviklar glede ved å bruke språk som kommunikasjonsmiddel, som reiskap for tenking og som uttrykk for eigne tankar og kjensler.» (Rammeplan for barnehagen, 2017, s. 23)

Kropp, rørsle, mat og helse

Glede over rørsle, god mat og kvile er grunnlaget for ein sunn barndom. I barnehagen vår får barna utforske kroppen sin gjennom leik og aktivitet, oppdage gleda ved å lage og dele mat, og lære kor viktig det er å ta vare på seg sjølve og kvarandre.

Barn lærer verda og seg sjølve å kjenne gjennomkroppen. Rørsle, sanseinntrykk, mat og helse er grunnlaget for trivsel, utvikling og livsglede. I barnehagen legg vi til rette for at barna får bruke kroppen sin på mange måtar, både i leik, kvardagslege aktivitetar og på turar i naturen. Vi ønskjer å gi barna gode vanar og haldningar knytt til sunt kosthald, hygiene, fysisk aktivitet og kvile.

Gjennom daglege rutinar og aktivitetar tileignar barna seg kroppsbehersking, både grovmotoriske og finmotoriske ferdigheiter. Vi nyttar uteområdet, turar i nærmiljøet og faste opplegg som klatrevegg på treningssenteret til å gi barna utfordringar og meistringsopplevingar. Når barna får vere aktive saman, utviklar dei ikkje berre styrke og kroppskontroll, men også sosial kompetanse – gjennom kroppsspråk, leik og samarbeid.

Vi legg vekt på å lære barna om sunne matvanar ved å la dei delta i matlaging og oppleve gleda av god, heimelaga mat. God balanse mellom aktivitet og kvile, saman med eit variert kosthald, er viktig for å utvikle ein sunn kropp og eit godt sjølvbilete.

Rammeplanen seier:
«Gjennom arbeid med kropp, rørsle, mat og helse skal barnehagen bidra til at barna utviklar glede ved å bruke naturen til leik og fysisk aktivitet, og utviklar respekt for eigen og andres kropp, og forståing for korleis ein kan ta vare på helsa si.» (Rammeplan for barnehagen, 2017, s. 24)

Kunst, kultur og kreativitet

Gjennom kunst, musikk, dans og drama får barna utforske verda med sansar og fantasi. Vi ønskjer å gi barna skaparglede og rom for å uttrykkje seg på eigne måtar, samtidig som dei får dele kulturelle opplevingar som byggjer fellesskap og glede.

Kunst, kultur og kreativitet gir barna rom for å utforske, sanse og skape. Gjennom forming, musikk, dans, drama og arkitektur får barna møte ulike materiale, reiskapar og teknikkar, og oppleve gleda ved å bruke eigne evner og fantasi. Vi legg til rette for at barna skal utvikle skaparglede, kreativitet og personleg uttrykk, samtidig som dei opplever fellesskap og samhøyrigheit gjennom felles prosjekt og kulturelle opplevingar.

Barnehagen gir barna moglegheit til å både oppleve kunst og kultur, og sjølv vere skapande deltakarar. Musikken, dansen, forteljingane og kunsten blir ei kjelde til rike indre opplevingar og til fellesskap der barna kan dele opplevingar og skape nye uttrykk saman. Barn skapar også sin eigen kultur ut frå erfaringar og inntrykk dei får i barnehagen og nærmiljøet.

Gjennom arbeid med kunst, kultur og kreativitet får barna eit mangfald av moglegheiter for sanseerfaringar, opplevingar, eksperimentering, skapande verksemd, tenking og kommunikasjon.

Rammeplanen seier:
«Gjennom arbeid med kunst, kultur og kreativitet skal barnehagen bidra til at barna får estetiske erfaringar som grunnlag for å tolke og skape meining, og at barna utviklar evne til å uttrykkje seg estetisk, samt gi dei høve til å oppleve kunst og kultur frå ulike tider og samfunn.» (Rammeplan for barnehagen, 2017, s. 25)

Natur, miljø og teknologi

Gjennom leik og opplevingar ute får barna lære å glede seg over naturen og undre seg over små og store fenomen. Vi ønskjer å skape kjærleik til naturen, gi barna innsikt i samspelet mellom menneske og miljø, og inspirere til å ta vare på jorda for framtida.

Naturen er ei rik kjelde til leik, undring og læring – til alle årstider og i all slags vêr. Gjennom turar i nærmiljøet får barna gode opplevingar som skapar kjærleik til naturen og forståing for samspelet mellom menneske, dyr og planter. Vi ønskjer å gi barna respekt for livet i naturen og grunnleggande kunnskap om miljøvern og berekraftig utvikling.

Barna får erfare naturen med alle sansar, oppdage landskap, plantar og dyr, og lære om årstidene, vêr og vind. Gjennom slike opplevingar får dei innsikt i naturens mangfald og livssyklusar. Vi legg også til rette for eksperimentering og utforsking, som til dømes å lage vasshjul, undre oss over kvar straumen kjem frå og bli kjende med enkle teknikkar og reiskapar.

Slik får barna ei gryande forståing for både natur og teknologi – og for korleis vi kan ta vare på ressursane våre for framtida.

Rammeplanen seier:
«Gjennom arbeid med natur, miljø og teknologi skal barnehagen bidra til at barna får kjennskap til naturen og ei gryande forståing for berekraftig utvikling, og at barna får høve til å oppleve naturen og undre seg over fenomener i naturen og teknologien.» (Rammeplan for barnehagen, 2017, s. 26)

Nærmiljø og samfunn

Vi ønskjer at barna skal kjenne seg som viktige deltakarar i fellesskapet – i barnehagen, i nærmiljøet og i samfunnet elles. Gjennom turar, opplevingar og forteljingar får dei oppleve både historie og samtid, og lære å møte mangfald med nysgjerrigheit og respekt.

Barnehagen er ein viktig arena for å bli kjent med verda utanfor familien. Gjennom turar, forteljingar og samtalar får barna innsikt i korleis samfunnet er bygd opp, både før og no. Vi ønskjer at barna skal kjenne på tilhøyrigheit til barnehagen, nærmiljøet, kommunen og samfunnet dei er ein del av.

Barna skal oppleve at dei er viktige deltakarar i fellesskapet. Medverknad til kvardagen i barnehagen er ofte første steg mot å forstå demokrati og fellesskap i større samanhengar. Vi legg vekt på å styrke kunnskap om lokalsamfunn, natur, kunst, kultur, arbeidsliv, tradisjonar og levesett. Slik får barna oppleve verdiar knytt til både lokal og nasjonal historie, og møte mangfaldet i samfunnet med tillit og nysgjerrigheit.

Gjennom å utforske nærmiljøet sitt blir barna kjende med kulturar og historier som høyrer til, og dei får erfare samanhengen mellom fortid, notid og framtid. Vi samtalar også om medias plass i kvardagen, og korleis det påverkar både barn og vaksne.

Rammeplanen seier:
«Gjennom arbeid med nærmiljø og samfunn skal barnehagen bidra til at barna utviklar forståing for ulike tradisjonar, levesett og familieformer, og gi barna grunnlag for å delta i samfunnet.» (Rammeplan for barnehagen, 2017, s. 27)

Mengde, rom og form

Matematikk er ein naturleg del av kvardagen til barna. Gjennom leik, undring og kvardagslege aktivitetar får dei oppleve gleda ved å utforske tal, former og mønster – og oppdage at matematikk finst overalt.

Barn møter matematikk kvar dag gjennom leik, nysgjerrigheit og utforsking. Når dei sorterer, konstruerer, tel, måler og samanliknar, utviklar dei gradvis matematiske ferdigheiter og forståing for samanhengar. Dette skjer både i planlagde aktivitetar og i kvardagslege situasjonar – frå puttekassar og puslespel til leik med klossar, baking og måling.

Dei yngste barna orienterer seg i rommet ved å vite kvar leikane er, kvar dei et og kvar dei søv. Etter kvart blir barna opptekne av former, fargar, bokstavar og tal. Gjennom leik, eksperimentering og fellesskap får barna høve til å utforske rom, mengder og former, og til å utvikle språk og omgrep knytt til matematikk.

Vi legg til rette for at barna kan samle, sortere og samanlikne naturmateriale som pinnar, skjell og steinar, og at dei kan oppleve matematikk gjennom songleikar, rime-reglar og tur-taking. Slik får dei erfare at matematikk er ein naturleg del av både leik og kvardagsliv.

Rammeplanen seier:
«Gjennom arbeid med mengde, rom og form skal barnehagen bidra til at barna opplever glede over å utforske og leike med tal og former, og utviklar forståing for matematiske omgrep og samanhengar.» (Rammeplan for barnehagen, 2017, s. 28)

Etikk, religion og filosofi

Barna undrar seg over livet, verda og menneska rundt seg. I barnehagen ønskjer vi å gi rom for undring, refleksjon og samtalar, og lære barna respekt, toleranse og glede over mangfald – samtidig som vi tek vare på verdiar frå kristen og humanistisk tradisjon.

Etikk, religion og filosofi hjelper barna å forstå verda og menneska rundt seg, og legg grunnlaget for verdiar og haldningar. Kristen tru og tradisjon, saman med humanistiske verdiar, har gjennom hundreår prega norsk og europeisk kultur. Verdiar som respekt for menneskeverd og natur, åndsfridom, nestekjærleik, tilgjeving, likeverd og solidaritet finn vi igjen i mange religionar og livssyn, og desse er også forankra i menneskerettane.

Noreg er i dag eit fleirkulturelt og multireligiøst samfunn. Barnehagen skal spegle og respektere dette mangfaldet, samtidig som vi tek vare på verdiar frå kristen og humanistisk arv og tradisjon. Vi legg vekt på gode samspelsverdiar, og på å skape rom for undring, refleksjon og samtalar som bidreg til at barna utviklar toleranse, respekt og interesse for kvarandre.

Barna skal få utvikle identitet og kulturell tilhøyrigheit gjennom møte med forteljingar, høgtider og tradisjonar frå ulike kulturar og livssyn. Gjennom samtale, forteljing og felles undring skal barna oppleve at ulike livssyn, kulturar og familieformer blir verdsette.

Rammeplanen seier:
«Gjennom arbeid med etikk, religion og filosofi skal barnehagen bidra til at barna blir kjende med ulike tradisjonar, verdigrunnlag og livssyn, og få høve til å reflektere over etiske spørsmål og lære å vise respekt og toleranse for kvarandre.» (Rammeplan for barnehagen, 2017, s. 29)